文章分享 : 富事通：樓市神話

前晚，同老友食飯拆大閘蟹。老友之一，80後，早三年結婚上車，有車有樓。早排賣咗架車，家陣想賣埋層樓。
「點解賣樓？你老婆肯過你？」我問。
「我老婆都贊成喎！換番層細少少、平少少，套啲現，揸多少錢喺手，冇壞。」老友老婆，做零售業，市道好唔好，有第一手感覺。

買樓只問價錢

老友又聽聞，𠵱家業主大晒，甚至有地產經紀都話：「睇樓？邊使睇？價啱就買。反正，如果人哋買來投資，層樓係點又有乜所謂？如果自用，都一定會拆晒啦！」買家不問質素，只問價錢，究竟係乜嘢現象呢？
噚日，又約咗青姐、晨姐兩位食晏，行過IFC，見到好多地產經紀。坦白講，我到今日都仲係唔明白，點解有人相信可以喺條街，隨便都撈到個客，大嗱嗱拎幾十球去買新界豪宅。
食晏時，同兩位阿姐交流小道消息。大家不約而同都話，金融界市道好淡，股票經紀做看更，不在話下。青姐更加話，佢識得嘅Old Money，舊年8月開始已經慢慢放貨：「升住放，點都好過跌住走。」
「高價搶居屋公屋班人，我都唔識點講佢哋。」我話。「不過，今時今日叫買樓嘅人量力而為，猶如阻人發達，有違香港核心價值，分分鐘俾人鬧死。」
「聯儲局都話低息至少維持到2015年中，再加上特區政府唔可能突然間加大供應。最最最緊要，銀紙貶值，磚頭一定升。既然遲早都要買，點解唔早啲買？」
以上對白，香港每個地產經紀都識。有咁宏觀嘅視野，我都只可以引用Joe Kennedy嘅一句名言：「當擦鞋仔都畀股票貼士，就係時候套現離場。」

需求未必永存

一，供應，唔可以只睇一手新樓數目，需求亦唔一定永遠存在。二，聯儲局可以控制短息，不過對長息影響有限。三，再者，美滙唔一定會永遠地低。
以上三個未知因素加起來，我只可以話，所有泡沫都有個好壞嘅結局。願祝大家好運。

李兆富

爽報(16-10-2012)