新春願望

踏入牛年，新春願望最希望係身體健康，其次就係財源廣進。

信定唔信

任總最近提示我地話要小心金融海嘯第二波快將來臨，重預期呢次重犀利過去年9月，你話佢危言聳聽又得，話佢未卜先知都無所謂，因為呢個並唔係你信同唔信的問題，而係你信唔信都好，佢都會黎!!
預料春節過後會有一批企業倒閉，無辦法啦，接唔到訂單，想捱都捱唔到落去啦；
最近市場焦點集中匯豐，09年減派息就梗架喇，問題係究竟會減一半定超過一半?(抑或好似高盛估計完全無息派?)到3月公佈業績時就知，佢管理層否認需要集資，市場對之半信半疑，不過小弟就話寧願配股都不要政府入股，如果唔係就有排插!!
另外右圖係1年期黃金對比恆生指數走勢圖，上面陰陽燭就係黃金，下面紫色線就係恆指，一拍埋就可知黃金超強勢!!你話唔買黃金點得?
(唉，講都講到口臭了.....)

利用孳息率曲線催吉避兇

事緣小弟早已於2006年尾至07年間向客戶指出孳息率曲線出現逆向(即短期孳息高過長期孳息)，根據歷史經驗話比我地知，呢個係經濟衰退先兆，要做好風險管理措施，但奈何當時股市暢旺，好多人話今次可能失效，惟事實又一次證明不能不信，譚Sir亦曾於08年3月提出孳息率曲線問題
詳見>>>(http://opinion.atnext.com/viewthread.php?tid=15296&extra=page%3D11)
尤幸小弟一早做好準備，得以於今次海嘯獨善其身，反而可把握今次機會，用不合理的價格去買入心儀的投資項目呢!!
另外小弟查閱現時坊間的”黃金基金”/”商品基金”，大部份都只係投資落一些金礦股度，不能直接受惠金價，反而黃金ETF(編號2840)就可跟金價走，當一般交易所基金咁買賣就可，好方便，投放一部份資金可達分散風險作用。

醜婦終需見家翁

大戶藉經濟數據疲弱，以及美銀沽售內銀股影響，在大成交下於15800見阻力回落，其實呢一切一早都預左係咁，全球經濟衰退底下，數據點會好?美政府怎能撥亂反正?美資銀行缺水，咁啱股份禁售期屆滿，仲唔減持等幾時?加上超人亦減持中行，如果信佢好似之前沽航運股咁洞悉先機的話，今次行動是否意味住黎緊內銀股無運行?抑或超人等錢洗，所以要急急腳沽貨套現?黎緊重會唔會陸續有策略股東配售?
最近油價因中東局勢抽升，惟相信最終維持響40美元樓下上落，而同時間黃金價格表現硬淨，我又不厭其煩地一再重申買黃金，原因係美國負債沉重，奧巴馬都講到明黎緊佢要接收一萬億美元赤字!!大佬，一萬億喎，重要係美元計算喎，唔將貨幣貶值，點催谷出口去減低赤字?美元不值錢的話，資金定流向黃金，另外當金融機構用晒之前政府投入的救市資金後，到底係政府又再注資?定係聽天由命?加上現時美國策略係將其負債“出口”，日本及中國手持大量美國國債，國債一爆煲的話，重大獲過今趟金融海嘯!!